有「吹神」之稱嘅 Eason，着埋呢件白色泡泡袍，肥到冇頸咁喎！吹神今次一改作風，全晚只講咗 3次嘢，最長一次講足 10分鐘，話：「原來好難唔講嘢……我𠵱家有使命感，做騷唔當公事，盡量令你哋開心。」 

FBI

狂食鵝髀瀨　暴肥 20磅　 Eason凸腩開騷

爆到七彩，連開 25場嘅陳奕迅「 Eason's Life香港演唱會」上星期六晚終於喺紅館開騷。呢個演唱會咁難撲飛，當然唔少得 FBI去捧場。當晚 Eason以 6個造型亮相，長到拖地嘅道士帽最誇張，演唱會中段 Eason仲喺無安全帶之下坐喺鐵箱被吊高三層樓繞場唱〈信任〉，當時鐵箱搖得好勁， FBI都戥佢牙煙，好彩最後都有驚無險。

完騷後， Eason換番黑衫黑褲便服，去後台接受訪問。 FBI發現換咗衫後嘅 Eason連肚腩都凸咗出嚟，但唔使 FBI篤爆， Eason已經忍唔住講：「我𠵱家有成 188磅重，係入行以來最肥，不過我唔會為開騷減肥。」
FBI八到，原來 Eason近排愛上咗食燒鵝瀨粉，演唱會綵排中間嘅休息時間，佢都鍾意叫碗鵝瀨歎吓，仲指定要鵝髀添呀！眼見 Eason愈來愈肥，經理人陳家瑛當然睇唔過眼，叫佢減肥，不過你有你講， Eason有 Eason繼續食。所以短短兩個月，佢就肥咗 20磅嘞！就連 Eason嫂徐濠縈之前幫老公搵咗一大堆開騷衫，都因為佢肥咗而唔啱着，要臨時搵過設計師度身訂造添呀！

188磅史上最肥自爆肥到 188磅， Eason唔單只肥到肚凸凸，仲有埋個雙下巴。一碗鵝髀瀨起碼有 500卡路里，咁食法唔肥就假！ 

吊高三層樓繞場唱歌，沒用安全帶嘅 Eason唱〈信任〉時被搖晃到甩嘴，佢自己都忍唔住笑。 

長到拖地嘅道士帽最誇張。演唱會中段 Eason講笑話：「好似後面觀眾遠咗啲，但遠啲好，睇到我對腳『撩』啲。」其實 Eason包到咁實，完全睇唔到肥膏，連 FBI都差啲俾佢呃咗！

Eason嫂徐濠縈孖住大劉女友甘比嚟撐老公，甘比仲帶埋大女秀樺嚟睇，但就唔見 Eason嘅寶貝女康堤在場。 

陳家瑛做咗 Eason經理人咁耐就睇住 Eason一日肥過一日，當然忍唔住提佢減肥，點知 Eason係咁 hea佢，無瘦不特止，仲肥咗！《蘋果日報》圖片 

(繼續閱讀...)